Ја продолжуваме традицијата и шеста година по ред ги израдувавме првачињата со подароци за успешен почеток на новото поглавје во нивниот живот. Во рамки на кампањата „Секогаш биди број 1“, посетивме повеќе основни училишта во неколку градови низ Македонија и дониравме пакет подароци со училишни материјали за првачињата. Годинава дел од оваа активност се основни училишта во населби и села во Струмица, Крива Паланка, Скопје, Прилеп, Куманово, Штип, Свети Николе и Крушево. Станува збор за училишта кои не беа вклучени во кампањата во текот на изминатите пет години бидејќи нашата цел е „Секогаш биди број 1“ да стигне до што повеќе населени места во државата.
„Ова е една од нашите најдраги активности за општествена одговорност, со оглед на тоа што е посветена на најмладите кои започнуваат ново патување во училишните клупи. Секогаш е добро да се инвестира во децата и нивниот раст и развој бидејќи тие се нашата иднина. Особено нѝ е драго што во изминатите шест години успеавме кампањата „Секогаш биди број 1“ да ги израдува првачињата во речиси сите населени места низ Македонија, но тоа не значи дека ќе запреме, туку со задоволство ќе ја спроведуваме и во иднина“, вели Георги Руков, ко-основач и управувачки партнер во Credissimo.
Годинава дел од училиштата во кои доставивме подароци за првачињата е Основното училиште со ресурсен центар „Иднина“, кое обезбедува воспитно – образовни активности за ученици со попреченост.
„Задоволство нѝ е што годинава ОУРЦ „Иднина“ е дел од кампањата „Секогаш биди број 1“ и што нашите првачиња добија подароци со училишни материјали за успешен почеток на новата учебна година. Не постојат мали и големи иницијативи, туку само иницијативи кои се искрени и од срце, особено кога се насочени кон поддршка на децата. Ние ги учиме нашите ученици дека поддршката и другарството се едни од најважните работи во животот, и токму затоа драго нѝ е што се вклучивме во активноста на Credissimo“, вели Лорета Андреевска, директорка на ОУРЦ „Иднина“.
Во рамки на кампањата „Секогаш биди број 1“, за шест години подаривме пакети со училишен прибор на вкупно 3770 првачиња во 86 основни училишта. Спроведуваме повеќе општествено одговорни активности насочени кон подигнување на свеста за машкото и женското здравје, еко-акции, реновирање библиотеки и донации во Зоолошката градина во Скопје.
